1. júní 2008

Heimsókn 1. bekkjar

Í vikunni fyrir páska komu nemendur í 1. bekk Grunnskólans á Hellu í heimsókn á Lund. Þau lásu og sungu fyrir íbúa og máluðu egg með aðstoð íbúanna.

Það gerir mikið fyrir alla á Lundi þegar börn koma í heimsókn og vonandi verður meira um svona skemmtilegar heimsóknir á næstunni.

Fyrirmyndar fyrirtæki

Hjúkrunar og dvalarheimilið Lundur fékk viðurkenningu Vinnueftirlits ríkisins sem fyrirmyndar fyrirtæki í vinnuverndarvikunni.  Viðurkenningin var afhent á Grand Hótel í Reykjavík 23. október á ráðstefnu Vinnueftirlitsins sem haldin var í tilefni af norrænu vinnuverndarvikunni.  Það voru fjögur fyrirtæki sem fengu viðurkenningu; Hjúkrunar og dvalarheimilið Lundur, Jarðboranir, Mjólkursamsalan og Kjötvinnsla Sauðárkróks. 

Þetta er í fyrsta sinn sem Hjúkrunarheimili á Íslandi fær þessa viðurkenningu.  Það var nefnd frá vinnueftirlitinu sem kom fyrir skömmu á Lund og tók viðtöl og skoðaði aðstæður og valdi heimilið í kjölfarið sem fyrirmyndar fyrirtæki og á skjalinu sem Lundur fékk stendur að viðurkenningin er veitt fyrir framúrskarandi vinnuverndarstarf árið 2007.   

Við afhendinguna kom fram að ástæðan fyrir því að Lundur var valin væri sú að til þess að lyfta þungum byrgðum væru ætíð notuð hjálpartæki sem heimilið er vel búið að, í tveimur herbergjum hafa verið settar lyftibrautir í loftið, allir starfsmenn fá fræðslu í líkamsbeitingu, unnið er eftir sveigjanlegu vaktakerfi "Time care" þar sem starfsfólkið velur sér sínar sínar vaktir sjálft. Lundur hefur sett sér heilsueflingarstefnu og hefur heilsuviku einu sinni á ári fyrir starfsfólk þar sem lögð er áhersla á hollan mat og fengin fyrirlestur um eitthvað heilsueflandi.  Gefin hefur verið út starfsmannahandbók þar sem fjallað er m.a. um heilsueflingarstefnu, jafnréttisstefnu, fræðsla um líkamsbeitingu o.fl.  Það kom einnig fram að þeim þótti mjög áhugavert að þar sem mikil mannekla væri í umönnunarstörfum væri biðlisti eftir að komast í vinnu á Lund og að á Lundi væri mjög lítil starfsmannavelta. 

Á móti viðurkenningum tóku: Margrét Ýrr Sigurgeirsdóttir hjúkrunarforstjóri, Guðrún Jónsdóttir og Kristín Gunnarsdóttir öryggistrúnaðarmenn. Sjá myndir.

Lundur 30 ára

Í tilefni af 30 ára afmæli Hjúkrunar- og dvalarheimilisins Lundar var opið hús laugardaginn 3. nóvember þar sem rúmlega 330 gestir heimsóttu Lund.

Veitt voru þakkarskjöl þeim félagasamtökum sem hafa styrkt Lund á árinu, það voru: Ólafssjóður sem gaf Lundi gjörgæsludýnu að upphæð 661.000, Kvenfélagið Lóan gaf loftdýnu að verðmæti 180.000, Kvenfélagið Unnur gaf 200.000, Kvenfélag Oddakirkju gaf 150.000 og Kvenfélag Ásahrepps gaf 50.000 og þessum fjármunum var varið til kaupa á loftdýnum í sjúkrarúm.

Lundi bárust afmælisgjafir frá ýmsum aðilum: Peningaupphæð frá Ásahrepp, Kvenfélaginu Sigurvon í Þykkvabæ og Rangárvallaprófastdæmi, 50 tommu plasmasjónvarp frá Kvenfélaginu Unni, gjafabréf fyrir hátíðarmat frá Sólfugli, gamlan sveitasíma í minningarherbergið frá Kvenfélaginu Einingu svo eitthvað sé nefnt.

Til skemmtunar á afmælisdaginn söng Stúlknakórinn Hekla og barnakór Oddakirkju, Nína Morávek og Írena Steindórsdóttir spiluðu, Öðlingarnir sungu nokkur lög og systkinin Gísli Stefánsson og Kristjana Stefánsdóttir sungu.

Í lokin var það kór íbúa Lundar sem söng lag í tilefni dagsins með frumsömdum texta. Sr. Guðbjörg Arnardóttir var veislustjóri og stóð sig með mikilli prýði. Gestir og íbúar voru ánægðir með hátíðlega og skemmtilega dagskrá. Lundur þakkar öllum sem lögðu okkur lið á afmælisdaginn við að gera hann ógleymanlegan. Þökkum einnig fyrir allar gjafir og kveðjur sem bárust á afmælisdaginn.

Smellið á myndirnar til að stækka þær.

Starfsmenn heiðraðir

29. október 2007
Tveir starfsmenn voru heiðraðir fyrir 10 ára starf á Hjúkrunar- og dvalarheimilinu Lundi á starfsmannafundi í september. Það voru þær Hlín Magnúsdóttir og Snæbjört Ýrr Einarsdóttir. Þær fengu úr að gjöf  með miklu þakklæti fyrir vel unnin störf á síðustu 10 árum. 

Hlín og Snæbjört

Einnig fengu tveir starfsmenn viðurkenningu fyrir bestu mætinguna 2006 það voru Kristbjörg Sigurjónsdóttir og Margrét Bjarnadóttir. Innilega til hamingju!

Margrét og Kristbjörg

Hrafnistukórinn í heimsókn

23. september 2007
Kór íbúa Hrafnistu kom á Lund 17. september s.l. og hélt tónleika fyrir heimilisfólk Lundar. Lögin voru einstaklega skemmtileg og mikil gleði fylgdi þessari heimsókn. Lundur fékk Kvikmynd að gjöf frá Hrafnistu sem er heimildarmynd um íbúa Hrafnistu og heitir Ómur af söng. 

Gestunum var boðið í léttan hádegisverð áður en þeir héldu áfram ferð sinni á Kirkjuhvol.